Цагдаагийн ерөнхий газрын даргыг хүлээн авч уулзлаа
Шүүхийн ерөнхий зөвлөлийн дарга Л.Энхбилэг өнөөдөр (2024.02.02) Цагдаагийн ерөнхий газрын дарга, дотоодын цэргийн командлагч, цагдаагийн хурандаа Т.Сүхболдыг хүлээн авч уулзлаа.
Уулзалтад Шүүхийн ерөнхий зөвлөлөөс Шүүхийн ерөнхий зөвлөлийн гишүүн Д.Зүмбэрэллхам, Б.Ундрах, Э.Зоригтбаатар, Шүүхийн ерөнхий зөвлөлийн Гүйцэтгэх нарийн бичгийн даргын албан үүргийг түр орлон гүйцэтгэгч Л.Санжрагчаа, Шүүхийн ерөнхий зөвлөлийн Шүүгчийн хараат бус байдал, хууль ёсны ашиг сонирхлыг хамгаалах албаны дарга Х.Билгүнзаяа, Цагдаагийн ерөнхий газрын Захиргааны удирдлагын газрын дарга, цагдаагийн хурандаа Л.Нямдаваа, Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Н.Лхагвасайхан, Цагдаагийн ерөнхий газрын Төлөвлөлт, зохион байгуулалтын хэлтсийн дарга, цагдаагийн дэд хурандаа Г.Мөнгөншагай, Цагдаагийн ерөнхий газрын Гэрч, хохирогчийг хамгаалах хэлтсийн дарга, цагдаагийн хурандаа Б.Буянтөр, Нийтийн хэв журам хамгаалах, олон нийтийн аюулгүй байдлыг хангах албаны Шүүх, шүүгчийн аюулгүй байдлыг хангах хэлтсийн дарга, цагдаагийн дэд хурандаа Б.Бат-Эрдэнэ нар оролцов.
Уулзалтаар Монгол Улсын шүүхийн тухай хууль, Цагдаагийн албаны тухай хууль болон холбогдох бусад дүрэм, журмын хэрэгжилтийг хангах, Цагдаагийн байгууллагаас шүүх, шүүгчийн аюулгүй байдлыг хангах, шүүх хуралдааны дэг сахиулах хамтын ажиллагааны талаар санал солилцов.
Талууд нэн тэргүүнд гэрч, хохирогчийг хамгаалах, шүүгч, түүний гэр бүлийн гишүүний аюулгүй байдлыг хангах хамгаалалтын арга хэмжээг хэрэгжүүлэх чиг үүргийг хэрэгжүүлж байгаа алба, газар, нэгжийн бүтцийг боловсронгуй болгоход шаардагдах хүний нөөц, автомашин техник хэрэгсэл, цагдаагийн алба хаагчдын томилолтын зардлын асуудлыг шийдвэрлэхэд анхаарч ажиллахаа илэрхийлж байлаа.
Мөн яллагдагчийг хуяглан хүргэх, шүүхийн дуудсанаар ирэхгүй байгаа яллагдагч, шүүгдэгч, гэрч, зохигч, хэргийн оролцогчийг албадан ирүүлэх, шүүхээс оргон зайлсан яллагдагч, шүүгдэгч, ялтныг эрэн сурвалжлах, шүүх, шүүгчийн аюулгүй байдлыг хангах чиглэлээр шүүгч, шүүхийн захиргааны ажилтан болон цагдаагийн алба хаагчдад зориулсан сургалтыг зохион байгуулахад хамтран ажиллана гэв.
Шүүгчийн хараат бус байдал, хууль ёсны ашиг сонирхлыг хамгаалах алба
Хэвлэл мэдээллийн хэлтэс