Бусдын өмчлөлд бүртгэлтэй үл хөдлөх эд хөрөнгийг гэр бүлийн гишүүдийн дундын эд хөрөнгө гэж үзэхгүй

Шийдвэрийн огноо, дугаар: 2023.01.24-ний  өдрийн №137/ШШ2023/00023

Шийдвэрийн төлөв: Хүчин төгөлдөр болоогүй.

Тойм: 2023.02.17, шийдвэр №2,

Иргэн А нь нөхөр Б-д холбогдуулан гэрлэлт цуцлуулах, тэтгэлэг гаргуулах, гэр бүлийн дундын хөрөнгө болох автомашинаас өөрт болон хүүдээ ногдох хэсэгт 6,0 сая төгрөг гаргуулах, орон сууцаа өөрийн болон хүүгийнхээ өмчлөлд шилжүүлэн авах тухай нэхэмжлэлийг шүүхэд гаргажээ.

Нөхөр Б нь гэрлэлтээ цуцлуулах, хүүдээ тэтгэлэг төлөхийг зөвшөөрч, автомашиныг хамт амьдарч байхдаа хадам ээждээ худалдан борлуулсан, 7,6 сая төгрөг дансаар орж ирсэн тул хүү болон эхнэр А-д ногдох хэсэгт 5,066,000 төгрөг төлнө, орон сууцны үнийг бүрэн төлөөгүйгээс худалдагч тал гэрээгээ цуцалсан тул би байрыг нь буцаан өгч, мөнгөө авахаар болсон гэж маргасан.

Хэрэгт авагдсан баримтаар, гэрлэгчид болох А, Б нар хамт амьдарч байхдаа автомашиныг худалдан борлуулсан, үнээс 1,4 сая төгрөгийг бэлнээр авч хамтын хэрэгцээндээ зарцуулсан, үлдэх 7,6 сая төгрөг нөхөр Б-гийн дансанд шилжиж орсон болох нь, мөн нөхөр Б нь иргэн З-тэй 2021.03.20-ны өдөр орон сууц худалдах, худалдан авах гэрээ байгуулж, үнэ 45,5 сая төгрөгийг төлөхөөр банкнаас болон бусдаас зээл авч өгсөн, үлдэгдэл мөнгийг төлөөгүйгээс талууд 2022 оны 07 сар орон сууц худалдах худалдан авах гэрээгээ цуцлах тухай гэрээ байгуулан нотариатаар гэрчлүүлсэн, төлсөн төлбөр болон орон сууцаа харилцан буцааж өгөхөөр тохирсон, одоо уг орон сууц нь иргэн З-гийн өмчлөлд бүртгэлтэй болох нь тус тус тогтоогдсон байна. 

Мөн гэрч З шүүхэд, “Б-тэй орон сууц худалдах худалдан авах гэрээ байгуулсан, Б орон сууцны үнийг бүрэн төлөөгүй тул гэрээгээ цуцалсан, би орон сууцны өмчлөгч, улсын бүртгэлд ч бүртгэлтэй хэвээрээ байгаа” гэж мэдүүлжээ.

Шүүх А, Б нарын гэрлэлтийг цуцалж, Б-гээс хүүхдийн тэтгэлэг гаргуулж, мөн хариуцагч Б-гийн зөвшөөрснөөр 5,066,000 төгрөгийг гаргуулан А-д олгож шийдвэрлэсэн бөгөөд нэхэмжлэгч А-гийн орон сууцны өмчлөх эрхийг шилжүүлэн авах шаардлагыг хэрэгсэхгүй болгож шийдвэрлэсэн. Тодруулбал, Орон сууц худалдах, худалдан авах гэрээний дагуу үнийг бүрэн төлөөгүйгээс гэрээг цуцалсан, иргэн З нь орон сууцны өмчлөгч тул А нь хуульд зааснаар өмчлөх эрхийг шилжүүлж аваагүй мөртлөө бусдын орон сууцыг гэр бүлийн гишүүдийн дундын эд хөрөнгө гэж үзэж Б-гээс өөрийнхөө өмчлөлд шилжүүлэхийг шаардах эрхгүй гэж үзсэн байна.

Санамж: Энэхүү тойм нь шүүхийн шийдвэрийг орлохгүй бөгөөд  олон нийтийг мэдээллээр хангах зорилготой болно.”

Тойм бэлтгэсэн: Дорноговь аймгийн Замын-Үүд сум дахь сум дундын шүүхийн Ерөнхий шүүгч А.Цэрэнханд

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Шийдвэрийг бүтнээр харах цахим холбоос: