БАНК ГЭРЭЭГЭЭР БОЛОН ШҮҮХИЙН ШИЙДВЭРГҮЙГЭЭР ЗЭЭЛДЭГЧИЙН ЭД ХӨРӨНГИЙГ ХУРААН АВАХ ЭРХГҮЙ

БАНК ГЭРЭЭГЭЭР БОЛОН ШҮҮХИЙН ШИЙДВЭРГҮЙГЭЭР

                                ЗЭЭЛДЭГЧИЙН ЭД ХӨРӨНГИЙГ ХУРААН АВАХ ЭРХГҮЙ

Шийдвэрийн огноо, дугаар: Дорноговь аймгийн Замын-Үүд сум дахь сум дундын шүүхийн 2023 оны 04 сарын 14-ны өдрийн  137/ШШ2023/00110  шийдвэр

Шийдвэрийн төлөв: Хүчин төгөлдөр болоогүй.

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно”.

Нэхэмжлэгч А нь хариуцагч О,Ө, нарт холбогдуулан үнэт эдлэл болох 2 ширхэг хаш хөөрөгний үнэ 15,880,000 төгрөг гаргуулах тухай нэхэмжлэлийн шаардлага гаргажээ.

Хариуцагч О,Ө нар нь үнэт эдлэлийн үнэ 15,880,000 төгрөгийг хүлээн зөвшөөрөхгүй тухайн үед үнэт эдлэл болох 2 ширхэг хөөргийг А нь зээлээ хаахын тулд “Од” барьцаалан зээлдүүлэх газарт тавьсан, улмаар тус барьцаалан зээлдүүлэх газарт хулгай орж эд зүйл алдагдсан тул учирсан хохирлыг “Од” барьцаалан зээлдүүлэх газар хариуцана гэж маргасан.

Маргааныг шүүх хянан хэлэлцээд нэхэмжлэгч А-гийн нэхэмжлэлийн шаардлагыг хангаж шийдвэрлэв.

Хэрэгт авагдсан баримтаар, А нь зээлийн гэрээний үүрэгт тухайн сарынхаа зээлийн төлбөрийг төлж чадаагүйн улмаас Гэрэл банкны эдийн засагч О,Ө нар нь гэрт нь ирж зээлийн төлбөрөө төлөхийг шаардаж, А –ийн 2 ширхэг цагаан хаш хөөргийг банкинд хадгална барьцаанд авна гэж авч  явсаны дараа О,Ө нар нь уг 2 хаш хөөргийг зээлдэгчийн зөвшөөрөлгүйгээр  “Од” барьцаалан зээлдүүлэх газарт өгч хадгалуулсан бөгөөд тухайн барьцаалан зээлдүүлэх газарт хулгай орж А-ийн 2 ширхэг цагаан хаш хөөрөг алдагдсан үйл баримт тогтоогдсон байна.

Шүүх О,Ө нарыг зээлдэгчийн зээлийн барьцаанд тавиагүй эд хөрөнгийг гэрээгээр болон шүүхийн шийдвэргүйгээр дур мэдэн авч А-гийн зөвшөөрөлгүйгээр  гуравдагч этгээд болох “Од” барьцаалан зээлдүүлэх газарт хадгалуулсанаас үүсэх хохирлыг О,Ө нар хариуцана гэж шүүх дүгнэсэн болно.

Иймд шүүх “Од” барьцаалан зээлдүүлэх газарыг 2 ширхэг хөөрөгний үнэ 15,880,000 төгрөгийг хариуцах хууль зүйн үндэслэл байхгүй гэж үзэж, хариуцагч О,Ө нараас  2 ширхэг хөөрөгний үнэ 15,880,000 төгрөгийг гаргуулахаар шийдвэрлэсэн.

            Шүүхийн шийдвэрийг бүтнээр харах цахим холбоос:  https://shuukh.mn/single_case/126392?daterange=2023-01-01%20-%202023-05-01&id=1&court_cat=1&bb=1 ЭНД дарж үзнэ үү.

Тойм бэлтгэсэн: Дорноговь аймгийн Замын-Үүд сум дахь сум дундын шүүхийн шүүгч Д.Цэдэнпэлжээ.

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Шийдвэрийг бүтнээр харах цахим холбоос: https://shuukh.mn/single_case/126392?daterange=2023-01-01%20-%202023-05-01&id=1&court_cat=1&bb=1